刊登于 2015-05-08By dingdingAll, 周围旅行

足球从来都係比较受男性欢迎,有波睇嘅时候球场酒吧多数都係堆满男性,女性係比较少见。但呢个现象係咪就代表无女仔会真係睇波?

无错,的确有一啲比较令人呆一呆嘅问题係由女性发问,例如:
「一阵英格兰!我要睇碧咸!」或者,
「终于世界盃!有得睇曼联!」又或者,
「今晚热刺对热火!一定好好睇啦係咪?」又或者,
一路睇一路问人:「咩叫越位?」

女性对足球嘅冷言冷语亦都比男性多,例如:
「廿几个人争个波,都唔知有咩好睇。」
「夜妈妈起身睇波?听日唔洗返工返学呀?」
「一件波衫1000蚊?淘宝啦咪一样。」

总括嚟讲,球迷入面大大部份係男性,但当中都有女性唔係为咗陪男朋友,而係真心中意睇波嘅。除咗笔者本人,笔者都有几个女性朋友係真係热爱足球,同男球迷一样係会半夜三更起身睇一场球赛。

我细细个就开始睇波。小学果阵日韩世界盃,无时差问题,一放学返屋企老豆就坐喺梳化睇波,食饭对眼都一秒不离电视。细细个嘅记忆特前别深刻,仲记得果一年中国队第一次入到决赛周(well係因为日韩自动晋级让多咗2个位比亚洲队,唔係中国劲),分组赛对巴西/土耳其/哥斯达嚟加,场场波吞蛋,(唔好问咗点记得,我都唔知,但係真係连啱啱上年果届世界盃我都无记得咁清楚),果阵真係日日放学衫都唔换就飞去睇波,上瘾到连重播都唔放过⋯⋯(好记得我果阵最中意果队英格兰八强输咗俾巴西,所以十六强赢人果场我有翻睇⋯⋯)最后睇咗足足一个月,俾老豆影响下钟意咗睇,从此十岁未够嘅我就踏上球迷不归路⋯⋯

虽然钟意睇波,但欧洲波凌晨踢对一个几岁细路都係一个考验。果阵老豆为咗吸引我陪佢半夜起身睇,买晒薯片引诱我,咁我又真係俾佢tum到,2点几3点佢一拍我我就即刻弹起身陪佢一路食薯片一路睇。不过十几年后而家身份已经调转,啱啱过去嘅巴西世界盃,係由我负责较闹钟或者索性唔训,到够钟就入房叫老豆大人起身睇波。有时仲要叫极都唔起,跟住几个字之后醒咗出嚟又问我点解啱啱唔叫佢 ( -_- ) ⋯⋯(就係有场semi 7-1果场⋯⋯佢一起身睇到个比数就即刻入返房训haha) 不过同时都感叹,经过十几年无数父女温馨睇波嘅晚上,老豆已经开始年纪大,已经无我细细个果阵咁兴致勃勃⋯⋯

呢几年幸运地有机会嚟到英国读书,三年睇波都唔洗就时差一禁个制就睇到,虽然都有老猫烧鬚嘅时候(上年回程返香港机票买咗喺欧联决赛果日,被朋友无限耻笑),但最后一年都有机会去咗我队红魔主场睇一场英超 - 详程睇《去奥脱福睇一场曼联!》,当中感受永世难忘⋯⋯

附图 今晚去朋友屋企睇今届欧联semi,佢仲煮埋饭我食⋯⋯唉不过拜仁巴塞係我心目中梦幻决赛戏码嚟架嘛

女仔唔可以真係钟意睇波?